Hvað eru margar kukkustundir í einum sólarhring?

Hvað haldið þið að Björgólfur Guðmundsson hafi margar klukkustundir í hverjum sólarhring? Hvað haldið þið að hann hafi marga daga í árinu?

Jú svarið er einfalt: JAFN MARGA OG VIÐ HIN.

Síðan dettur okkur í hug að vegna tímaskorts getum við aldrei náð neinum markmiðum í lífinu, hann var nánast gjaldþrota en er samt á þeim stað sem hann er í dag og við vitum öll. Á banka og fótboltalið í Ensku... geri aðrir betur.

Hvernig fór hann að þessu, er hann yfirnáttúrulegur? Nei ég þarf ekki að spurja hann ég veit að hann hefur lagt allt undir og lagt tilfinningu í sín markmið og framkvæmt. Hann hafði líka þekkingu á rekstri og því setti hann saman þau þrjú púsl sem þarf til í árangurspúslið (tilfinningu eða áhuga, þekkingu og framkvæmd).

Það er alltaf tími til að bæta líf sitt, það hefur verið marg sannað, aðeins spurning um forgangsröðun og rétt hugarfar. Höfum bara hugfast að við höfum jafn margar klukkustundir í sólarhringnum og Björgólfur, hugsið ykkur það er í raun ekkert sem skilur okkur frá honum, nema kannski nafnið og hver vill heita Björgólfur eða Björgmundur eða Björg-eitthvað.......

Tilfinningaleysi

Nú þegar við öll erum búin að setja okkur markmið fyrir þetta ár þá er mikilvægt að við setjumst niður og áttum okkur á því hvernig við ætlum að uppfylla áramótaheitin, markmiðin og draumana okkar.´

Það eru þrjú atriði sem við verðum að setja niður fyrir okkur. Í fyrsta lagi er það náttúrulega að setja sér markmið, áramótaheit eða draum. Í öðru lagi þarf náttúrulega að framkvæma þau (ótrúlegt en satt).

Þriðja atriðið er það sem ég ætla að gera að umræðuefni hér er að til að ná árangri þarf tilfinningu. Tökum dæmi af einstakling sem setur sér það markmið að hreyfa sig á nýju ári, fara í líkamsrækt eða eitthvað álíka. Ef hann segir við alla þegar hann er spurður um nýársheitið: Ja ég er að spá í að fara að hreyfa mig"!!?? SPÁ er ekki lýsandi dæmi um einstakling sem setur tilfinningu í markmið sitt. Þessi einstaklingur mun kannski afreka að kaupa sér mánaðakort í líkamsrækt og nota það mögulega einu sinni.

Það eina sem þessi einstaklingur græddi var að losna við pening og eins og þið sjáið þá skiptir máli fjárhagslega að setja tilfinningu í hlutina. Einstaklingur sem setur tilfinningu í það sem hann gerir mundi segja: ,,Ég ætla að létta mig um 15 kíló á 3 mánuðum", þarna er bæði ákvörðun og markmið.

Það sem við segjum og gerum er það sem ákvarðar framtíð okkar. Takið eftir því í kringum ykkur hvernig fólk talar og þið munið sjá samhengi milli árangurs og þess hvernig fólk talar.

Ímyndaðu þér...

Öll mannanna verk byrja í huganum. Hallgrímskirkja var fyrst búin til í huga arkitektsins. Hver fjölskylda byrjar í huga þeirra einstaklinga sem setjast á móti hverju öðru og með glit í auga hefja líf saman, samband.

Draumar og markmið eru önnur orð yfir ímyndun, það að sjá fyrir sér framtíðina og mála hana.

Þess vegna skiptir máli að við sjálf setjumst niður og ímyndum okkur næsta ár, árið sem draumar okkar og markmið náðust. Með því að setja niður á blað eða í huga okkar þau atriði sem við viljum raunverulega ná og afreka virðast önnur atriði sem skipta okkur ekki máli hverfa. Það er jú svo margt í lífi okkar sem truflar okkur. Hið stöðuga áreyti auglýsinga reyna að villa okkur sýn og leiða okkur áfram í þá átt sem aðrir vilja. Því er það enþá mikilvægara í nútímaþjóðfélagi að við vitum og gerum okkur grein fyrir því hvert við stefnum eða öllu heldur hvert við viljum stefna.

Hvers vegna eru margir Nóbelsverðlaunahafar skyldir þ.e. börn Nóbelsverðlaunahafa hafa líka fengið Nóbelsverðlaun? Er það vegna þess að sumar fjölskyldur eru afburðafjölskyldur eða er það vegna þess að það er klíkuskapur í kringum Nóbelinn? NEI það er vegna þess að börn Nóbelsverðlaunahafanna gátu séð það fyrir sér að þau næðu því, höfðu trú á ímyndun sinni.

Setjum okkur markmið og sjáum fyrir okkur drauma okkar og síðast en ekki síst, leyfum þeim að koma til okkar án þess að við séum sjálf að setja okkur hindranir, við getum allt ef við bara leyfum lífinu að koma til okkar. 

5 armbeygjur

Hversu margar armbeygjur getum við gert?

Ef við leggjumst á gólfið og getum gert 5 armbeygjur er það allt sem við getum gert???? NEI það er ekki allt, hvíldu þig í eina mínutu og þú munt geta 5 í viðbót.

Ef þú æfir þig dag eftir dag þá munt þú á endanum geta gert 50 armbeygjur í einu eða 100 allt eftir því hversu mikið þú hefur æft þig.

Svona er lífið líka, við getum gert miklu meira en við getum í dag. Við getum gert miku meira með því að æfa okkur og læra meira.

Um leið og við gerum okkur grein fyrir því að við getum nánast aldrei sagt við nokkurn mann: ,, Ég bara get ekki meir", heldur: ,,Ég get bara ekki meira NÚNA en á morgun......."

Ef við viljum ná langt og ná árangri þurfum við að æfa okkur. Ekki láta núverandi ástand eða getu setja ykkur hindranir, við getum öll miklu meira, en það kostar bara æfingu og tíma.

Væri ekki sniðugt að byrja núna að æfa það sem þú villt vera góður í?

GLEÐILEGA HÁTÍÐ ÖLL SÖMUL

MEGI KÆRLEIKUR OG FRIÐUR JÓLANNA VERA MEÐ YKKUR

Góðverk um jólin

Nú þegar jólin nálgast og jólastressið að buga mörg okkar skulum við taka saman höndum og gefa af okkur og þannig létta á okkur öllum síðasta spölinn. það er nefnilega miklu auðveldara að klára jólainnkaupin og undirbúninginn með eitthvað gott á samviskunni og eins ef einhver hefur rétt manni hjálparhönd.

Gerum góðverk fyrir jólin og sköpum þannig bylgju kærleikans sem léttir á okkur öllum.

Gerðu góðverk sem skiptir máli, ekki gjafir eða peninga. Gefðu verkefni, góð orð og aðstoð.  Við höfum alltaf tíma til þess því ánægjan sem skapast við góðverk fleytir okkur áfram yfir allar hindranir og þannig spörum við tíma á móti.

Njótum lífsins með hvort öðru yfir jólin og gleðjumst saman.

Hvað færð þú í laun?

Einhverju sinni var maður spurður að því hvað hann hefði í laun. Maðurinn svaraði því til og sá sem spurði hváði þá við og spurði hvort hann væri sáttur við þau laun.

Maðurinn svaraði því til að fyrirtækið borgaði bara ekki hærri laun.

Spyrillinn leiðrétti hann og sagði: þú meinar fyrirtækið borgar ÞÉR ekki hærri laun.... Er fyrirtækið ekki að borga öðrum starfsmönnum 5-10 sinnum hærri laun? Maðurinn sagði jú það væri rétt.

Munurinn á þeim sem fá lág laun og þeim sem fá há laun er einfaldlega sá að sá sem fær hærri laun  hann er verðmætari starfsmaður.

Ef þú villt fá hærri laun skaltu finna leiðir til að verða verðmætari starfsmaður. Þú getur gert það með því að tileinka þér þá hæfileika sem þeir best borguðu í fyrirtækinu hafa, þannig getur þú komist í þá stöðu að geta farið fram á launahækkun.

Ó hve ólík við erum

Það er ótrúlegt hvað við getum öll verið sammála um hvað kynin eru ólík en þrátt fyrir það virðumst við lítið gera í því að skilja hvert annað.

Þegar við kaupum okkur heimilistæki finnst okkur sjálfsagt að við fáum með því leiðarvísi en þegar við hefjum 50 ára samband við annan einstakling þá eigum við bara að þreifa okkur áfram.

Gott dæmi um lítið mál sem skipt getur miklu er nöldur. Nöldur er afleiðing lítils misskilnings milli kynjanna.

Tökum dæmi. Þegar karlamðurinn kemur heim úr vinnu er konan komin heim á undan. Karlinn tekur dagblaðið og sest í sófann og byrjar að lesa. Þá byrjar ballið, konan byrjar að nöldra í manninum um allt sem aflaga er á heimilinu (eina ferðina enn). Karlinn er hins vegar fúll yfir því að fá ekki að lesa blaðið sitt í friði. Báðir aðilar finna fyrir neikvæðum tilfinningum og sambandið er orðið brothætt ef þetta gerist ýtrekað.

Ástæðan. Konan þarf að tala til að láta sér líða vel. Karlinn þarf að komast frá raunveruleikanum til að láta sér líða vel.

Lausnin. Konan pantar tíma hjá karlinum um leið og þau hittast. Konunni líður vel því hún fær tíma til að ræða málin. Karlinum líður vel því hann fær þá tíma til að setjast niður í 5-10 mín án þess að vera truflaður. Þegar svo tíminn er kominn á samræðurnar verða þær miklu auðveldari, karlinn er á staðnum til að hlusta (er ekki í Írak eða í Bolungarvík) og konan getur rætt um það sem raunverulega er að hrjá hana.

Eins og lausnin er einföld, hvað fáir vita af henni og nýta sér hana. Konan þarf að læra að panta tíma og karlinn að læra að hlusta.

 

Ekki lesa, þetta gæti breytt lífi þínu...

"Sumt fólk hefur lært að þéna vel en hafa ekki lært að lifa vel" -- Jim Rohn

"Og á endanum er það ekki árin í lífinu sem telja. Heldur lífið í árunum." -- Abraham Lincoln

"Að vera ríkur snýst ekki um peninga. Að vera ríkur er hugarfar. Sum okkar, sama hversu mikinn pening við eigum munu aldrei eiga tíma til að stoppa við og borða innan úr vatnsmelónu. Og sum okkar verða rík án þess að eiga meira en næstu launaútborgun." -- Harvey B. Mackay

"Gerðu líf þitt stórkostlegt; sjáðu fyrir þér líf án takmarkana fyrir því hvað þú getur orðið, fengið eða gert." -- Brian Tracy

"Flest fólk eyðir meiri tíma í að skipuleggja fríið sitt eða partíið heldur en að skipuleggja líf sitt." -- Denis Waitley

"Tilgangur lífsins er ekki að vera hamingjusamur. Heldur að koma að gagni, vera heiðarlegur, samúðarfullur og að það hafi skipt máli að þú lifðir og lifðir vel." -- Ralph Waldo Emerson

"Lífstíll er listin að uppgötva leiðir til að lifa óvenjulega." -- Jim Rohn

Hvers vegna er ég hér?

Við veltum oft fyrir okkur hvers vegna við erum á ákveðnum stað, í ákveðinni vinnu eða ákveðnu sambandi. Oft veltum við þessu svo mikið fyrir okkur að við gleymum að velta því fyrir okkur hvers vegna og hvernig kemst ég út úr því.

Það er mikilvægt að við áttum okkur á því að við erum í dag á þeim stað sem við ákváðum í gær og á morgun verðum við á þeim stað sem við ákveðum í dag.

Við erum í þeirri vinnu sem við réðum okkur í gær, í. Við erum í því sambandi sem við ákváðum að fara í, í gær.

Ef við erum ekki sátt við stöðu eða staðsetningu okkar í dag þá er það eina sem við þurfum að gera er að ákveða að vera annars staðar á morgun. Setja sér markmið og stefna að því. Í biblíunni stendur á einum góðum stað ,,Í upphafi var orðið", ef við veltum þessu fyrir okkur aðeins sjáum við að upphafið var ekki það að eitthvað kom fyrir okkur, nei í upphafi var orðið og þetta orð getum við sótt innra með okkur, með hugsunum okkar og tilfinningum breytum við framtíð okkar.

Látum ekki morgundaginn líða fyrir hugsanaleysi dagsins í dag. Setjum okkur markmið og vinnum að þeim og að endingu mun lífið leika við okkur alla daga og allar nætur.